再續與王子的約會? XD + 星期五的羽毛球對決? XD

尋晚終於可以同王子去尖沙咀買衫 真好:o69: 見時間尚早都係行左去
uniqlo買野 去到無耐王子同我都搵到目標 不過王子試完衫之後覺得
唔太岩身 最後都係無 睇來真係要減肥啦 XDXD 之後又行左過SOGO
食野 今次試拉麵 份量算中等 味道算過得去 之後每人再買多兩個薯餅
今次除左牛肉另外再試蝦肉 不過始終都係牛肉才是皇道

之後又再慢慢行去旺角 同上次一樣 大家又開始講下D事非 好快就行
到去旺角 同王子上信和搵書 但最後又係空手而回 之後上無印睇衫
睇中件V領泠衫 $195ja... 不過天氣仲係有d熱都係遲下先買 之後去左
m記坐左陣就各自歸家~

今日因為阿東book左場 所以突登早兩個鐘返去打羽毛球~ 經過個多
星期的練習(?) 而家d手勢熟練左好多 起碼開波失誤的次數已經少左
好多 同阿晶和新識的阿鋒互相打左十幾分鐘之後就自己去貫水飲
返到來見阿豆都來左 就睇下佢地打 隔左一陣就同佢地玩雙打 初初
係我拍阿晶 阿豆拍阿東 打左兩盤 大家都互有領先 不過最後我地都
輸左XD 之後我去拍阿東 初初大家都無咩連携 但打左幾球就開始好
好多 不過成日比阿豆D陰招得手!! 最後我同阿東都羸番一盤 好開心~
星期一我地再決戰啦 阿豆!!

童夢....

尋日去左睇童夢奇緣 雖然係遲左少少... 原本尋日係我,王子,大隊同阿藍
去睇 不過我無講清楚睇幾點 攪到阿藍趕唔切 sorry..... 之後就我地都準
時入場 初段的劇情比較輕鬆 例如一開頭講少年版劉德華離家出走比飾
演爸爸的黃日華搵到 劉德華開出條件 要比$300佢先肯返屋企 係現場
飾演警察的杜汶澤同田芯妮又係度嘈交

去到中段 當劉德華開始長大時返去搵飾演老師的應采兒 有一個位係
應采兒想同劉德華kiss 但劉德華竟然掛住睇佢0個三個耳孔=___="
之後劉德華開始變到老年 原本相約好同她去睇戲 但最後無去 之
後係戲院門口企 當戲院關門時 佢問應采兒 你係唔係等人?你 會唔會
嬲佢唔來 她話 "唔會 我仲有時間等" 聽到呢句我又諗起某人....

到後段劉德華去搵爸爸相認 呢一刻劉德華終於知錯 睇到呢度都開始
漂下眼水 最後又同莫文蔚和好如初 整體上由中段開始已經有唔少
touching位 同王子都覺得相認呢一段比較感動 不過大隊話呢套唔夠
催淚 可能大隊太邪惡啦XDXD

雜記一則....

今日又係要上D&T的LAB 今個第一次畫立體圖 以為好難 原來又唔係喎
都係好簡單咁拉幾條直線鈄線就攪掂 但今日阿豆就畫極都畫唔掂 D線成
日拉錯XDXD 咁似上堂的我既........ 另外今日有堂VAF的LECTURE 講左
D電影的歷史 幾吸引 又同TONY講下近排睇左D咩戲 今日先知TONY
原來好鍾意睇戲~~ 之後阿SIR就播左戀愛的地圖的其中一個故事"台北編"
比我地睇 D對白好攪笑 一個台灣人同日本人係度不停雞同鴨講XD

到左5點幾落堂就準備走 JERREY今日參加左band soc的o' night 咁陪
佢HEA一陣 點知原來JJ都有去 之後我同阿東就聽到JERREY講唔係
咁想同JJ一齊去 係呢刻大家的想法都好一致 覺得JJ係好麻煩 講野無
聊又多廢話之前仲要坤人去做傳銷 初初以為只有我係咁諗 原來大半
班的諗法都係咁 哈....

悶..+.慶..(?)

呢排無咩野攪 悶到無野寫... 今日算係成個星期比較好的一日 放11:30
放左學見無咩野做又唔想咁早返屋企 咁就成班人落尖咀打機 落到玩左
陣BG4就同阿東兩丁友去左新港睇野 主力又係睇衫... 呢排出親街都係咁..
不過好彩無咩衫睇中想買.... 同埋發覺double-park的野都係唔適合我既....

之後攪到3點幾就散水 再同阿東出旺角睇NDS game 佢想買星之卡比
不過頜錢唔太0岩心水 我就睇中隻應援團 不過無水 都係捱多個零星期
先入手 之後王子打比我話唔舒服 今晚唔出 咁就搭車返灣仔..

到夜晚想問下浩傑book左壁球場未 但之後話上星期整親腳唔打 咁尋晚
就講唔去啦!! 等我又去約埋michael!!

初探西九龍海濱長廊 XD

今日約左使徒去西九龍海濱長廊諗住影下維港 但一出街望下個天......
好大煙霞 心知今日都係要失望而回.... 我早左去到 咁就一個人去探下路
先 原來係西隧的巴士站都要行一段6,7分鐘的馬路先去到入口... 入到去
第一個感覺係好空矌 XDXD 有唔少長椅 之後再慢慢行 睇海景一流 最
衰今日天氣唔太好.... 之後就行返去九龍站搵使徒~

JOIN埋使徒之後就去食少少野同買野飲 之後就再行去西九龍海濱長廊
行到入去大家都有影下相 不過今日主力想影哂部T3筒菲林 所以部G3
影左幾張就收手~~ 之後影多張合照睇使徒打左一陣雀就走~ 之後行左
去九龍公園 原來呢度都好多野影 有蘿莉(?),正太(?)同雀仔~ 算係今日
影左最多菲林的地方 不過仲有5張先影完一筒....

跟住行左去金星打BG4 多謝使徒講下我的缺點~~ 之後就散水...

逄星期五晚的聚會??

今日上繪圖堂又係畫d front view,end view之類的野 不過今次好陰人
成日有d位縮左入去 攪到成日計錯d長度....... 最後攪到好趕之做好...

今日原本約人食飯 不過佢話唔得閒 咁無辦法啦 之後照舊搵浩傑同
michael~~ 係sogo window shopping左一陣就去食野 後尾揀左kfc 貪
佢有得坐下 今晚順手問浩傑拎左本繪圖書睇 傾左好耐 覺得又識多
左d野啦XDXD 之後見時間尚早 就一齊行落去北角搵糖水食~~ 今次
的路程唔太長~~ 沿途傾下足球同大家互串XD 食完糖水之後又坐左
陣 今次主力講近排咩戲好睇~ 講講下又講番D舊片 好似逃學威龍
好想搵番出來睇tim 之後見23:30咁就散水 今晚又係過得幾開心~~

另
呢排個個都為情所困既?

雜項兩則...

今朝maths quiz 份卷初初睇落好易 但到做的時候就計錯哂....... 岩岩睇
番d notes 錯得好白痴呀.............

之後今日堂VAF又係要出去戶外拍野 今次拍十個指定的shot 幾好玩 要
完全跟足拍戲的步驟做 頭幾個shot都唔太難 去到拍第4個shot的時候
開始麻煩... 唔係好熟部機個快門同光圈 攪左成幾個字先拍好 中途仲有三
個女仔問我地拍緊咩 XDXD 最後都係仲有三個shot未拍 下堂再攪掂佢...

另
呢排開始日日帶NDS返學對戰 遲下仲有meeting攪~~

有感而發...

今日想打電話約某人食飯... 不過打左兩次都無人聽 有少少放棄的念頭.. 返到
屋企 見佢有online 咁順便問多次.. 之後都有覆番我電話 有時覺得只係咁少的
事已經 令到自己唔開心 如果遇到一 些不幸的事 咁我會點?可能本身自己的
心情起伏比較 大啦... 浩傑又講中左一樣野...當一個局外人睇一件事可以睇得
好清楚 但局內人就好多時有好多顧慮...

無意中搵到b小姐的xanga 咁睇左陣 先知佢原來咁細個.. 返工時都估唔到...
覺得最多都係同我同齡 睇左一陣發覺佢逄星期日都要返part-time平日返工
都算幾忙 但仲返埋part-time 睇多陣先明白原來佢算係家庭的經濟支柱 同初
初比我的感覺完全兩回事... 睇來我都係唔識睇人啦....... 係呢刻諗左陣 到底我
返左成年幾工 為屋企做過咩? 幾餐飯? 少少的家用比幾百蚊阿女麻? 好似都無
試過為屋企做過一d 有意義的事 有少少內疚...

星期六...睇電車男+散步? XD.......

今日的例會由9:00-21:00 咁早係因為今日去左睇電車男 以$30的價錢
算值回票價 比較鍾意套戲成日出現orz XDXD 其實選角方面同大家的觀點都
差不多 覺得男主角太靚仔啦~~ 女主角就就同阿藍諗法一樣 太成熟 XD 另外
比較突出的人物就係網吧三人組~ 由其是每一次戰爭的場面 XDXD 整體上故
事係不錯 只係現實中會發生的機會到底有幾多呢? 起碼我覺得最基本要兩人
都同一時間對大家有好感先有機會發生... 可能係我諗野唔會有太多的幻想空
間比自己啦

去到20:30左右已經無咩野做 同肥鳥係聯合坐左陣 WCCF又無岩的盃打 最後
都係提早散水 或者係今日太早出來啦... 等巴士時打比浩傑睇下佢係邊啦 見佢
係銅鑼灣又幾得閒 都係落去行下.... 第一站行下sogo先啦 又睇中件polo裇 但
五 行欠水.... 等減價先XD... 之後又開始散步 今日的行程由銅鑼灣出發 終點站
係西環 破哂之前的記錄.... 沿途的都係講0個D 其中一句說話係講得岩 當一
件事仲未發展呢個情況 你係唔需要預先估計件事情的發展 雖然平時都有咁
提醒自己 但都係無改變 今次希望我可以成功...

睇完某人的xanga 好似好灰咁............

再戰UNIQLO.....

今日返學無咩特別... 但今日終於知科data communication原來連linux都
要讀.... week8個quiz..................

因為今日約左王子去尖咀 所以五點幾就返左旺角休息一陣 之後就出發
差唔多19:00左右到尖咀 諗住搵下大隊出唔出 但打唔到 之後去左勝利
睇下有無野岩玩 最後睇王子玩幾鋪COM LV 8的秋上竟行去尖咀間SOGO
試下chicago的pizza~~ 沿途提起王子公司個麻煩友 之後又開始講下D返工
會遇到的人和事XDXD 去到就好快搵到位 等王子出去睇下有咩岩食 最後
決定左食日式醬燒雞PIZZA 我最後都揀左呢款 不過加生菜~ 之後再買多
兩個牛肉薯餅 講下PIZZA先 隻日式醬不錯 少少甜 同和民的和風PIZZA
一樣 算係我的至愛 另外薯餅炸得幾香口 D牛肉粒都不錯 最後埋單每人
$40左右~~ 之後又傾左陣廣東歌的野 講起大家近期聽開的葡萄成熟時!!
大家都係因為歌詞而鍾意首歌 不過大家鍾意的歌詞部份唔同...

之後行左陣SOGO睇鞋 不過無王子心水 所以行返去UNIQLO.... 一上到去
無咩人排隊喎.. 之後慢慢行去門口 等左陣 排隊的人開始以倍數增加 好
恐怖.... 入到去行左陣 同其他人所講一樣 比較靚的TEE都比人掃哂.. D裇
衫價錢唔太岩心水 原本睇中件POLO裇 不過太多人排隊比錢都係放棄...
之後同王子行路返旺角 沿途又開始講下事非XDXD 另外都講左D關於衣著,
工作上的問題同大家當初係點識XDXD 到左旺角就行去波鞋街陪王子睇鞋..
行左陣都睇中左一,兩對 最後睇中左一對NB的波鞋 D顏色都唔錯 最後王子
試左陣就科水~~ 之後再去左間DVD鋪 終於買左話買好耐的"AV" 聽晚先慢慢
睇....

數學苦手...

今日數學堂做tutorial... 雖然睇落好似好易 但到做的時候就亂哂龍... XD
死啦 下星期有quiz 係時候要加把勁... 岩岩都有拎番份tutorial出來計下 希望
呢排操得掂...

星期二...

因為調左堂的關係 今日只係返10:30-12:30 但今日搭巴士又遇到不幸的事
9:40上車 諗住好穩陣 點知長沙灣道塞車 龍頭都見唔到 喵的.. 最後都係
落車轉地鐵 最後都成10:55先返到去 好彩有人幫手點名...........

之後又返銀行搵人食飯 今次約左Joyce~ 好準時13:30去到中環 但佢打比我
話有客開戶口要遲d 我無所謂啦XD 咁去左搵下有咩食先.. 之後都係去左食餃
子.. 都係遲左一陣就出到來 好彩~ 又開始講下D無聊野 之後大家又呻下~~
咁又半個鐘... 始終咁多人之中最好傾的都係Joyce XD 之後又返銀行同某幾
個人傾計 今日都撞到好多人 例如周生,Bolia同Bibi....

搭車返旺角時阿鋒打比我話出來hea下 見有時間就出下來 今日的行程主要
又係尖沙咀XDXD 想行下間UNIQLO 不過勁多人 都係放棄 之後去左新開間
SOGO 行完的感覺同銅鑼灣0個間完全係兩碼子的事.... 之後係海傍傾左一陣
又歸家...

充實的星期五??

今日返學的時間又係14:30 極之討厭... 我寧願返8:30算數 今日又係上d&t
主要今日係練繪圖 教左一些基本功 講的野一如以往 廢..... 但到真係落手畫
時佢又真係畫得幾快同幾好喎 可能呢樣係佢唯一的優點啦....

之後夜晚去左一個比較陌生的親戚的婚禮 不過對我來講都只係一些應酬的
工作0者 仲要對住兩個不太熟絡的表哥,表姐 無野講就係無野講 近況都費事問
食物方面都係普普通通.... 之後同一對新人影埋合照就提早走人落中環......

落到中環又係搵浩傑同michael 但見創聲無位打機 咪去左茶餐廳吹陣水 都係
照舊大家互串一番 XDXD 之後再返創聲 都係咁多人 我同浩傑都係決定走....
之後我地一路由中環行落銅鑼灣之後再行番灣仔 路途上大家都係無所不談 最
後去左M記落腳繼續吹 大家近期又開始為愛情而煩惱~XD 之後又傾下大家對
前途的諗法... 佢講左好多我無諗過的問題 睇來我睇每一件事都係未夠全面....
以後可以傾心事的人選又多一位啦~~~